Síðstu dystirnir í grundspælinum hjá kvinnum og monnum vóru avgreidd í vikuskiftinum. Nú er endaspælið klárt, har kvinnur og menn fara at leika hálvfinalur og seinni finalur, um at gerast Føroyameistari.
Trý lið hava kappast hjá kvinnunum og kappingin hevur verið sera jøvn, við nøkrum sera vælleiktum og spennandi dystum. Kappingin er á tann hátt, at vinnarin av grundspælinum vinnur sær pláss í finaluni, meðan nummar 2 og 3 spæla best av trimum dystum í hálvfinaluni, um hvør vinnur seinna plássið í finaluni. Eftir eina sera tætta kapping millum Hamar og Sporðdrekan, dróg Sporðdrekin longra stráðið í síðsta innanhýsis dysti teirra millum og tryggja sær harvið 1. plássið. Hetta hevur við sær, at tað verða Hamar og Hávur sum skulu spæla hálvfinaluna hjá kvinnunum.
Úrslit og og skrá hjá kvinnum sæst her: https://clupik.pro/en/tournament/1322584/summary
Hjá monnum kann ikki sigast annað enn, at Føroyameistarnir úr Hamar hava verið einaráðandi. Hamar hevur vunnið allar teirra 12 dystir og harvið tryggja sær heimavallar fyrimun móti Sporðdrekanum, sum endaði á 4. plássinum. Hin hálvfinalan hjá monnum verður millum Ravn og Háv. Hávur endaði á 2. plássi í grundspælinum og fær tí heimavallarfyrimunin móti Ravni sum endaði á 3. plásinum
Úrslit og skrá hjá monnum sæst her: https://clupik.pro/en/tournament/1322376/ranking
